അക്രമാസക്തമായ ജനക്കൂട്ടത്തെ നേരിടുന്നതിനുള്ള പരിശീലനം സംഘടിപ്പിച്ചു

സംസ്ഥാന പോലീസ് മേധാവിയുടെ പ്രത്യേക നിർദ്ദേശത്തിന്റെ അടിസ്ഥാനത്തിൽ അക്രമാസ്‌ക്തമായ കലാപങ്ങൾ അടക്കമുള്ള ഏതു സാഹചര്യങ്ങളേയും കാര്യക്ഷമമായി നേരിടുന്നതിന് പോലീസ് ഉദ്യോഗസ്ഥർക്ക് പ്രത്യേക പരിശീലനം നൽകുന്നതിന്റെ ഭാഗമായി 08.08.2025 ൽ ആശ്രമം മൈതാനത്ത് വച്ച് 'മോബ് ഓപ്പറേഷനിൽ' പരിശീലനം സംഘടിപ്പിച്ചു. അക്രമാസക്തമായ ജനക്കൂട്ടത്തെ പോലീസിന്റെ വിവിധ സംവിധാനങ്ങൾ ഉപയോഗിച്ച് നിയമപരമായി പിരിച്ചുവിടുന്നത് എങ്ങനെയാണെന്ന് പൊതുജനങ്ങൾക്ക് കൂടി നേരിട്ട് കണ്ട് മനസ്സിലാക്കുന്നതിനായാണ് ജില്ലാ ഭരണകൂടവുമായി ചേർന്ന് ആശ്രാമം മൈതാനിയിൽ പരിശീലനം സംഘടിപ്പിച്ചത്. നിയമവിരുദ്ധമായ ആയുധധാരികളായ ജനക്കൂട്ടത്തെ പിരിച്ച് വിടുന്നതിനായി ആദ്യം മെഗാഫോൺ ഉപയോഗിച്ചും, ബാനർ ഉയർത്തിയും മുന്നറിയിപ്പ് നൽകുന്നു. തുടർന്നും ജനക്കൂട്ടം പിരിഞ്ഞ് പോകാൻ തയ്യാറാകാതെ വരുമ്പോൾ ടിയർ ഗ്യാസ് ഷെല്ലുകളും പിന്നീട് ഗ്രനേഡും പ്രയോഗിക്കുന്നു. എന്നിട്ടും ജനക്കൂട്ടം അക്രമാസക്തമായി തുടരുന്ന സാഹചര്യങ്ങളിൽ ലാത്തിച്ചാർജ്ജ് ചെയ്യ്തും അവസാനഘട്ടമായി തോക്ക് ഉപയോഗിച്ച് വെടിയുതിർത്തും അക്രമാസക്തമായ ജനക്കൂട്ടത്തെ പിരിച്ച് വിടുന്നു. ജില്ലാ പോലീസ് മേധാവി ശ്രീമതി. കിരൺ നാരായണൻ ഐ.പി.എസ് ന്റെ മേൽനോട്ടത്തിലാണ് പരിശീലന പരിപാടി സംഘടിപ്പിച്ചത്. നാഷണൽ പോലീസ് അക്കാദമിയിൽ നിന്ന് വിരമിച്ച ഡ്രിൽ ഇൻസ്‌ട്രെക്ടർ ശ്രീ. കെ.എൻ സോമൻ, കേരള പോലീസ് അക്കാദമിയിൽ നിന്നും കൊല്ലം സിറ്റി പോലീസ് ആസ്ഥാനത്ത് നിന്നുമുള്ള വിദഗ്ധ പരിശീലകർ എന്നിവരാണ് നേതൃത്വം നൽകിയത്. സബ്ബ് കളക്ടർ ശ്രീ നിഷാന്ത് സിഹാര ഐ.എ.എസ്, കരുനാഗപ്പള്ളി എ.എസ്.പി. ശ്രീമതി. അഞ്ജലി ഭാവന ഐ.പി.എസ്, എ.ഡി.എം ശ്രീ നിർമൽ കുമാർ, ജില്ലയിലെ അസിസ്റ്റന്റ് പോലീസ് കമ്മീഷണർമാർ, ഫയർ ആന്റ് റസ്‌ക്യൂ ഉദ്യോഗസ്ഥർ, മറ്റ് പോലീസ് ഉദ്യോഗസ്ഥർ എന്നിവരും പരിശീലനത്തിന്റെ ഭാഗമായിരുന്നു.