യുവാവിനെ കുത്തിക്കൊലപ്പെടുത്താൻ ശ്രമിച്ച കാപ്പാ പ്രതി അറസ്റ്റിൽ.

യുവാവിനെ കുത്തി കൊലപ്പെടുത്താൻ ശ്രമിച്ച ശേഷം ഒളിവിൽ കഴിഞ്ഞുവന്ന നിരവധി കേസുകളിൽ പ്രതിയായ യുവാവ് പിടിയിലായി. തഴുത്തല കാവുവിള, വിളയിൽ പുത്തൻ വീട്ടിൽ ഹാരിസ് മകൻ പൊട്ടാസ് എന്ന നിഷാദ്(34) ആണ് കൊട്ടിയം പോലീസിന്റെ പിടിയിലായത്. നെടുമ്പന സ്വദേശി കൃഷ്ണലാൽ(24) എന്ന യുവാവിനെയാണ് തഴുത്തല വഞ്ചിമുക്കിന് സമീപത്ത് വച്ച് ഇയാൾ കുത്തി കൊലപ്പെടുത്താൻ ശ്രമിച്ചത്. ജൂലൈ മാസം 17-ാം തീയതി രാത്രി 11 മണിയോടെ കൊട്ടിയം-കണ്ണനല്ലൂർ റൂട്ടിൽ സുഹൃത്തിനൊപ്പം ബൈക്കിൽ സഞ്ചരിക്കുന്നതിനിടയിൽ ആ വഴി മറ്റൊരു ബൈക്കിൽ വന്ന പ്രതിയുമായി ഉണ്ടായ തർക്കമാണ് അക്രമത്തിലേക്ക് നയിച്ചത്. പ്രകോപിതനായ പ്രതി കൈയ്യിൽ കരുതിയിരുന്ന കത്തി ഉപയോഗിച്ച് യുവാവിനെ ആക്രമിച്ച് ഗുരതരമായി പരിക്കേൽപ്പിക്കുകയായിരുന്നു. കൊട്ടിയം, കണ്ണനല്ലൂർ, കിളികൊല്ലൂർ, കുണ്ടറ എന്നീ പോലീസ് സ്റ്റേഷനുകളിലായി പതിനേഴോളം ക്രിമിനൽ കേസുകളിൽ ഇയാൾ മുമ്പ് പ്രതിയായിട്ടുണ്ട്. ഇയാൾക്കെതിരെ 2023, 2024 വർഷങ്ങളിൽ കാപ്പാ നിയമപ്രകാരം കരുതൽ തടങ്കൽ അക്കമുള്ള നടപടി സ്വീകരിച്ചിട്ടുണ്ട്. യുവാവിന്റെ പരാതിയുടെ അടിസ്ഥാനത്തിൽ കൊട്ടിയം പോലീസ് കേസ് രജിസ്റ്റർ ചെയ്ത് നടത്തിയ അന്വേഷണത്തിൽ ഒളിവിൽ കഴിഞ്ഞുവന്ന പ്രതിയെ കണ്ടെത്തി അറസ്റ്റ് ചെയ്യുകയായിരുന്നു. ചാത്തന്നൂർ എ.സി.പി അലക്‌സാണ്ടർ തങ്കച്ചന്റെ നിർദ്ദേശപ്രകാരം കൊട്ടിയം പോലീസ് ഇൻസ്‌പെക്ടർ പ്രദീപിന്റെ നേതൃത്വത്തിൽ എസ്.ഐ നിഥിൻ നളൻ സി.പി.ഒ മാരായ സന്തോഷ്‌ലാൽ, റഫീഖ്, സുബിൻ, ശംഭു എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്യ്തത്