കൊല്ലം അഞ്ചാലുംമൂട്ടിൽ വൻ കഞ്ചാവ് വേട്ട: ഒഡീഷാ സ്വദേശി അറസ്റ്റിൽ

കൊല്ലം സബ്ബ് ഡിവിഷനിൽ അഞ്ചാലുംമൂട് പോലീസ് സ്റ്റേഷൻ പരിധിയിൽ 10 കിലോ കഞ്ചാവുമായ് ഒഡീഷാ സ്വദേശി അറസ്റ്റിലായി. ഒഡീഷാ സംസ്ഥാനത്ത് ഗജപതി എന്ന സ്ഥലത്ത് ഗുലൂബാ വീട്ടിൽ ശിവരാംനായക് മകൻ ബ്രഹ്‌മദാഷ് നായക് (55) ആണ് അറസ്റ്റിലായത്. കൊല്ലം നഗരത്തിൽ വിതരണം ചെയ്യുന്നതിന് വേണ്ടി ഒഡീഷയിൽ നിന്നും കൊണ്ടുവരുന്ന വഴി അഞ്ചാലുംമൂട് പോലീസ് സ്റ്റേഷൻ പരിധിയിലെ പെരിനാട് റെയിൽവേ സ്റ്റേഷനിൽ വച്ച് കൊല്ലം സബ്ബ് ഡിവിഷന്റെ ഡാൻസാഫ് ടീമും അഞ്ചാലുംമൂട് പോലീസും സംയുക്തമായി നടത്തിയ നീക്കത്തിനൊടുവിലാണ് ഇയാൾ അറസ്റ്റിലായത്. ഒഡീഷയിൽ നിന്നും ട്രെയിനിൽ വരവെ കൊല്ലം റെയിൽവേ സ്റ്റേഷനിലെത്തിയാൽ പിടിക്കപ്പെടുമെന്ന് മനസ്സിലാക്കി താരതമ്യേന ആളുകൾ കുറവുള്ള പെരിനാട് റെയിൽവേ സ്റ്റേഷനിലെത്തി കൊല്ലം ടൗണിലേക്ക് ഓട്ടോറിക്ഷായിൽ വരാൻ ശ്രമിക്കുന്നതിനിടയിലാണ് ഇയാൾ പിടിയിലായത്. രണ്ടാഴ്ചയ്ക്കുള്ളിൽ ഇത് രണ്ടാം തവണയാണ് ഒഡീഷയിൽ നിന്നും നേരിട്ട് കൊല്ലത്തേക്ക് കഞ്ചാവ് കൊണ്ടുവരുന്ന ഒഡീഷാ സ്വദേശികൾ അറസ്റ്റിലാകുന്നത്. രണ്ടാഴ്ച മുമ്പ് പള്ളിത്തോട്ടം പോലീസ് സ്റ്റേഷൻ പരിധിയിൽ 21 കിലോ കഞ്ചാവുമായി ഒഡീഷാ, ജാർഖൺഡ് സ്വദേശികളായ രണ്ട് പേരെ പള്ളിത്തോട്ടം പോലീസ് അറസ്റ്റ് ചെയ്യ്തിരുന്നു. മുൻ വർഷങ്ങളിൽ കേരളത്തിൽ നിന്നും പോയി ഒഡീഷയിലെത്തി തോട്ടങ്ങളിൽ നിന്നും കഞ്ചാവ് വാങ്ങി കേരളത്തിൽ എത്തിയിരുന്നെങ്കിൽ ഇപ്പോൾ ഒഡീഷയിൽ നിന്ന് നേരിട്ട് ഒഡീഷാ സ്വദേശികൾ തന്നെ കഞ്ചാവ് കേരളത്തിലേക്ക് കൊണ്ടുവരുന്ന രീതി വ്യാപകമാവുകയാണെന്ന് ഈ അറസ്റ്റുകൾ സൂചിപ്പിക്കുന്നു. വരും ദിവസങ്ങളിൽ ലഹരിക്കടത്തുമായി ബന്ധപ്പെട്ട് കർശന പരിശോധന ഉണ്ടാകുമെന്നും പിടിക്കപ്പെടുന്ന പ്രതികൾക്കെതിരെ കരുതൽ തടങ്കൽ ഉൾപ്പടെയുള്ള നടപടികൾ സ്വീകരിക്കുമെന്നും കൊല്ലം എ.സി.പി. എസ്. ഷരീഫ് അറിയിച്ചു. അഞ്ചാലുംമൂട് സി.ഐ ബാബു.ഇ, ഡാൻസാഫ് എസ്.ഐ കണ്ണൻ, ഡാൻസാഫ് ടീം അംഗങ്ങളായ ഹരി, ബൈജു ജെറോം, ദീലീപ് റോയ്, അഞ്ചാലുംമൂട് ജി.എസ്.ഐ പ്രദീപ് എന്നിവരുൾപ്പെട്ട സംഘമാണ് പ്രതിയെ അറസ്റ്റ് ചെയ്യ്തത്.