ബധിരയും മൂകയുമായ സ്ത്രീയെ മാനഭംഗം ചെയ്യാന്‍ ശ്രമിച്ച പ്രതി അറസ്റ്റില്‍

ബധിരയും മൂകയുമായ സ്ത്രീയെ മാനഭംഗം ചെയ്യാന്‍ ശ്രമിച്ചകേസില്‍ പ്രതി പിടിയില്‍. മയ്യനാട് വില്ലേജില്‍ നടുവിലക്കര ചേരിയില്‍ കുണ്ടുകുളത്തിന് സമീപം വയലില്‍ പുത്തന്‍വീട്ടില്‍ ലത്തീഫ് മകന്‍ റഫീഖ് 32 ആണ് കൊട്ടിയം പോലീസിന്റെ പിടിയിലായത്. ജൂണ്‍ മാസം 30-ാം തീയതി വൈകിട്ട് 4 മണിയോടെ മറ്റാരും ഇല്ലാതിരുന്ന സമയം നോക്കി യുവതിയുടെ വീട്ടില്‍ അതിക്രമിച്ച ്കയറിയ പ്രതി യുവതിയെ മാനഭംഗപ്പെടുത്താന്‍ ശ്രമിക്കുകയായിരുന്നു. യുവതി ഇയാളുടെ പിടിയില്‍ നിന്നും കുതറിമാറി രക്ഷപ്പെട്ട് ഓടിയതോടെ ഇയാള്‍ ശ്രമം ഉപേക്ഷിച്ച് സ്ഥലത്ത് നിന്നും പോവുകയായിരുന്നു. യുവതി പോലീസില്‍ പരാതി നല്‍കിയതായ് മനസ്സിലാക്കിയ പ്രതി പിന്നീട് ഒളിവില്‍ പോവുകയായിരുന്നു. തുടര്‍ന്ന് ഇയാള്‍ക്കായുള്ള തിരച്ചില്‍ നടന്ന് വരവെ ചാത്തൂര്‍ അസിസ്റ്റന്റ് പോലീസ് കമ്മീഷണര്‍ അലക്‌സാണ്ടര്‍ തങ്കച്ചന് ലഭിച്ച രഹസ്യ വിവരത്തെ തുടര്‍ന്ന് ഒളിവില്‍ കഴിഞ്ഞ് വന്ന ഇയാളെ എറണാകുളം ജില്ലയില്‍ നിന്നും പോലീസ് സംഘം അറസ്റ്റ് ചെയ്യുകയായിരുന്നു. കൊട്ടിയം പോലീസ് ഇന്‍സ്‌പെക്ടര്‍ പ്രദീപ്.പിയുടെ നിര്‍ദേശപ്രകാരം പോലീസ് സബ്ബ് ഇന്‍സ്‌പെക്ടര്‍ ജോയ്.ജെ, സൌരവ്, സിവില്‍ പോലീസ് ഓഫീസര്‍മാരായ ചന്ദു, അരുകുമാര്‍ എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്. അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്റ് ചെയ്തു.