ബസുകളിൽ പോലീസിന്റെ മിന്നൽ പരിശോധന

കെ.എസ്.ആർ.ടി.സി ഉൾപ്പടെ 260 ബസുകളിൽ നടത്തിയ പരിശോധനയിൽ മദ്യലഹരിയിൽ വാഹനമോടിച്ച 17 ഡ്രൈവർമാർക്കെതിരെ കേസ്

കൊല്ലം സിറ്റി പോലീസ് പരിധിയിൽ സർവ്വീസ് നടത്തുന്ന സ്‌കൂൾ-കോളേജ് ബസുകൾ, പ്രൈവറ്റ്, കെ.എസ്.ആർ.ടി.സി ബസുകൾ എന്നിവയിൽ പോലീസ് നടത്തിയ മിന്നൽ പരിശോധനയിൽ ഗുരുതര നിയമ ലംഘനങ്ങൾ കണ്ടെത്തി പിഴ ചുമത്തുകയും കേസ് രജിസ്റ്റർ ചെയ്യുകയും ചെയ്യ്തു. ജില്ലയിൽ സർവ്വീസ് നടത്തുന്ന ബസുകളിൽ വിവിധ തരത്തിൽ നിയമലംഘനം നടക്കുന്നതായി ശ്രദ്ധയിൽപ്പെട്ടതിന്റെ പശ്ചാത്തലത്തിലാണ് ജില്ലാ പോലീസ് മേധാവിയുടെ നിർദ്ദേശപ്രകാരം കൊല്ലം, ചാത്തന്നൂർ എ.സി.പി മാരുടേയും കരുനാഗപ്പള്ളി എ.എസ്.പി യുടേയും നേതൃത്വത്തിൽ പോലീസ് സ്റ്റേഷൻ എസ്.എച്ച്.ഓ മാരും മറ്റ് പോലീസ് ഉദ്യോഗസ്ഥരും ഉൾപ്പെട്ട സംഘം കൺഡ്രോൾ റൂം വാഹനങ്ങൾ ഉൾപ്പടെ പ്രയോജനപ്പെടുത്തിക്കൊണ്ടുള്ള ശക്തമായ പരിശോധന നടത്തിയത്. പൊതുജനങ്ങളുടെ സുരക്ഷിതമായ യാത്ര ഉറപ്പ് വരുത്തുന്നതിന്റെ ഭാഗമായാണ് ഡ്രൈവർമാർ ലഹരി ഉപയോഗിക്കുന്നുണ്ടോ, ലൈസൻസ് ഉണ്ടോ, യുണിഫോം ധരിക്കുന്നുണ്ടോ, വാഹനത്തിന് ഇൻഷുറൻസ് പരിരക്ഷയുണ്ടോ, മതിയായ സുരക്ഷാ സർട്ടിഫിക്കറ്റുകളുണ്ടോ എന്നിവ പരിശോധനയ്ക്ക് വിധേയമാക്കിയത്. 18.08.2025 രാവിലെ 7.00 മണി മുതൽ 10.00 മണി വരെ ഇരുന്നൂറ്റി അറുപതോളം വാഹനങ്ങളിൽ നടത്തിയ പരിശോധനയുടെ ഭാഗമായി പത്ത് പ്രൈവറ്റ് ബസ് ഡ്രൈവർമാർക്കെതിരെയും ആറ് സ്‌കൂൾ ബസ് ഡ്രൈവർമാർക്കെതിരെയും ഒരു കെ.എസ്.ആർ.ടി.സി ഡ്രൈവർക്കെതിരെയും മദ്യപിച്ച് വാഹനമോടിച്ചതിന് കേസ് രജിസ്റ്റർ ചെയ്യുകയും യൂണിഫോം ഉപയോഗിക്കാതിരുന്നതിന് രണ്ട് പേർക്കെതിരെയും കണ്ടക്ടർ ലൈസൻസ് ഇല്ലാതിരുന്ന ഒരാൾക്കെതിരെയും പിഴ ചുമത്തുകയും ചെയ്യ്തു. പൊതുജനങ്ങളുടെ സുരക്ഷിതമായ യാത്ര ഉറപ്പ് വരുത്തുന്നതിന്റെ ഭാഗമായി തുടർന്നും അപ്രതീക്ഷിതമായ ഇത്തരം പരിശോധനകൾ തുടരുമെന്നും നിയമലംഘനം നടത്തുന്നവർക്കെതിരെ ശക്തമായ നടപടികൾ സ്വീകരിക്കുമെന്നും ജില്ലാ പോലീസ് മേധാവി അറിയിച്ചു.