മുക്ത്യോദയം - വരയില്‍ വിസ്മയം തീര്‍ത്ത് ലഹരി വിരുദ്ധ ബോധവല്‍ക്കരണ ചിത്രരചന

കൊല്ലം സിറ്റി പോലീസ് വിവിധ വകുപ്പുകളുടെ സഹകരണത്തോടെ സംഘടിപ്പിച്ചു വരുന്ന ലഹരിയ്‌ക്കെതിരായ സംയുക്ത കര്‍മ്മ പദ്ധതിയാണ് മുക്ത്യോദയം ഈ പ്രവര്‍ത്തനത്തിന്റെ ഭാഗമായി ഉളിയക്കോവില്‍ ശ്രീരംഗത്ത് നഗറില്‍ ലഹരി വിരുദ്ധ ബോധവല്‍ക്കരണ ചിത്രരചന സംഘടിപ്പിച്ചു. ചിത്രകാരനും, അദ്ധ്യാപകനും ലളിതകലാ അക്കാദമി അവാര്‍ഡ് ജേതാവുമായ സന്തോഷ് കൃഷ്ണനും മകന്‍ സാരംഗ് സന്തോഷ് കൃഷ്ണയും ചേര്‍ന്നാണ് വരകളില്‍ വിസ്മയം തീര്‍ത്തത്. നഗറിലെ യുവതി -യുവാക്കള്‍, കുട്ടികള്‍, നിരവധി പോലീസുദ്യോഗസ്ഥര്‍ എന്നിവരും ചിത്രരചനയില്‍ പങ്കാളികളായി. കൊല്ലം സിറ്റി ജില്ലാ പോലീസ് മേധാവി കിരണ്‍ നാരായണന്‍ ഐ.പി.എസ് ചിത്രരചനയ്ക്ക് തുടക്കം കുറിച്ചു കൊണ്ട് കൂട്ടായ്മ ഉദ്ഘാടനം ചെയ്തു. എക്‌സൈസ് ഉദ്യോഗസ്ഥനായ ശ്രീകുമാര്‍ ബോധവല്‍ക്കരണ ക്ലാസ് നയിച്ചു. കൊല്ലം എ.സി.പി എസ്.ഷെരീഫ്, വോളണ്ടിയര്‍ കൗണ്‍സിലര്‍ ഭുവനേശ്വരി വി.ജെ തുടങ്ങിയവര്‍ ആശംസകള്‍ അര്‍പ്പിച്ചു. കൊല്ലം ഈസ്റ്റ് സബ് ഇന്‍സ്‌പെക്ടര്‍ ശബ്‌ന നന്ദി പറഞ്ഞു. മുക്ത്യോദയം ജില്ലാ കോ-ഓര്‍ഡിനേറ്റര്‍ സബ് ഇന്‍സ്‌പെക്ടര്‍ രാജു, ഈസ്റ്റ് ജനമൈത്രി പോലീസ് ഉദ്യോഗസ്ഥന്‍ മനോജ്, പോലീസ് ഉദ്യോഗസ്ഥരായ ജിനു, സംഗീത് തുടങ്ങിയവര്‍ പരിപാടികള്‍ക്ക് നേതൃത്വം നല്‍കി.