കൊല്ലം സിറ്റി പോലീസ് നേതൃത്വം നല്‍കിവരുന്ന ലഹരി വിരുദ്ധ കര്‍മ്മ പദ്ധതിയായ മുക്ത്യോദയത്തിന്റെ ഭാഗമായി പാരിപ്പള്ളി പോലീസ് സ്റ്റേഷന്‍ പരിധിയിലെ പുലിക്കുഴി നഗറില്‍ കൂട്ടായ്മ സംഘടിപ്പിച്ചു. ഈ കൂട്ടായ്മയില്‍ വച്ച് ബോക്‌സിങ് ദേശിയ താരവും, കേരളാ യൂണിവേഴ്‌സിറ്റി ബോക്‌സിങ് ടീമിന്റെ പരിശീലകനും, ഫിലിം ബോക്‌സിങ് കോറിയോഗ്രാഫറുമായ നൗഫര്‍ഖാനും സംഘാംഗങ്ങള്‍ ആയ ഡിക്‌സണ്‍ ജോയ്, അജു ബി, അഭിനവ് വി .എസ്സ്, മനു എം എന്നിവര്‍ ചേര്‍ന്ന് ബോക്‌സിങ് വിസ്മയം തീര്‍ത്ത് ലഹരിക്കെതിരായി ജീവിതമാകണം ലഹരി എന്ന സന്ദേശം പകര്‍ന്നു. പുലിക്കുഴി നഗര്‍ ബഡ്സ് സ്‌കൂള്‍ അങ്കണത്തില്‍ ചേര്‍ന്ന ജനകീയ കൂട്ടായ്മ കൊല്ലം സിറ്റി പോലീസ് കമ്മീഷണര്‍ കിരണ്‍ നാരായണന്‍ ഐ.പി.എസ് ഉദ്ഘാടനം ചെയ്തു. ഗ്രാമ പഞ്ചായത്തംഗം ഹരീഷ് പൂവത്തൂര്‍ അദ്ധ്യക്ഷത വഹിച്ച കൂട്ടായ്മയില്‍ പ്രദേശ വാസികളുടെ ആവലാതികളില്‍ പാരിപ്പള്ളി പോലീസ് ഇന്‍സ്പെക്ടര്‍ നിസാര്‍ എ മറുപടി പറഞ്ഞു. കൗണ്‍സിലിങ് സൈക്കോളജിസ്റ്റ് ബിസ്മിന ബോധവല്‍ക്കരണ ക്ലാസ് നയിച്ചു. രാജീവ്.ആര്‍ സ്വാഗതവും പാരിപ്പള്ളി സബ് ഇന്‍സ്പെക്ടര്‍ അബീഷ് നന്ദിയും പറഞ്ഞു. മുക്ത്യോദയം ജില്ലാ കോ-ഓര്‍ഡിനേറ്ററും സബ് ഇന്‍സ്‌പെക്ടറുമായ രാജു, പാരിപ്പള്ളി ജനമൈത്രി പോലീസ് ഉദ്യോഗസ്ഥന്‍ രഞ്ജിത്ത്, ജിനു, ഷീബ, അംബികാകുമാരി തുടങ്ങിയവര്‍ കൂട്ടായ്മക്ക് നേതൃത്വം നല്‍കി. പ്രദേശത്ത് കളിസ്ഥലവും, ലൈബ്രറിയും വേണമെന്ന യുവാക്കളുടെ ആവശ്യത്തിന്മേല്‍ തുടര്‍നടപടികള്‍ സ്വീകരിക്കുമെന്ന് സിറ്റി പോലീസ് കമ്മീഷണര്‍ ഉറപ്പു നല്‍കി. വിവിധ ആവലാതികള്‍ നേരിട്ട് സമര്‍പ്പിക്കുന്നതിനടക്കം നൂറിലധികം പ്രദേശവാസികള്‍ കനത്ത മഴയെയും അവഗണിച്ചു കൂട്ടായ്മയില്‍ പങ്കുചേര്‍ന്നു